Tan k beetik jump'éel mapa tia'al u chíikpajal yéetel tia'al u k'ajóolta'al tuláakal le máaxo'ob ku beetiko'ob wáa ba'ax tia'al u mu'uk'a'ankúunsa'al le maayao, ba'ax ku beetiko'ob, tu'ux ku meyajtiko'ob, le je'ela' u k'aabae':
Ichil túun le mapao' ma'a chen ku béeytal k ilik tuláakal le iniciativas yéetel le proyectos tu'ux ku meyaj le activistaso'ob ti maaya t'aan yano', beey xan, ku béeytal k nupikbáaj ti' ba'ax ku beetiko'ob ti'al jump'éel múuch' meyaj, ichilo'on yéetel uláak' activistas ti' maya t'aan way tu petenil mayabe'.
Ichil u bin u beetchajal le mapao' bin u k'ajóolta'al máako'ob u k'áato'ob, yan u muuk'il ti'ob yéetel lik'a'an u yóolo'ob tia'al u mu'uk'a'ankúunsiko'ob u t'aano'ob.
Le máako'ob yéetel ko'olelo'oba', walkila' táan u meyáajtiko'ob jump'éel Plan peninsular tia'al bix je'el u mu'uk'a'ankúunsiko'ob le maayao, ba'ax ku kaxantik le Plano', leti' u k'i'itbesik yéetel u mu'uk'ankúunsik u t'aanal le maayao je'el tu'ux kúuchilil ka máanak le maaya wíinik sáansamalo'. Le máaxo'ob jach u ts'áamaj u yóolo'ob u jóok'so'ob le meyaja', yéetel le ba'ax táan u beetiko'oba', táan xan u je'ek'abtiko'ob u bejil u kaláanta'al yéetel u mu'uk'ankúunsa'al maya t'aan ti'al tu paachil k'iin.
Le plan je'ela' ku kaxtik ya yanak ba'axo'ob unaj u beetal desde bejlae' tak tu paachil k'iin ichil tu láakal le ambitoso'ob tu'ux ku su'usu'utkubaj le maaya wíiniko' way peninsulae'.
Le ba'axo'ob' unaj tun u beetalo' jóok' ichil múuch' tsikbalo'ob virtuales, presenciales, yéetel u láak'o'ob. Tu'uxe' yanchaj jump'éel múuch' tuukul ichil tuláakal le máako'ob táakpajo'ob tia'al k kaxtik bix je'el u béeytal k mu'uk'a'ankúunsik le maaya t'aano'.